Ботаника және фитоинтродукция институты басқаруындағы Бас Ботаникалық бақтың қызметі табиғат, ғылым және қоғамның өзара ықпалдастығына негізделген және ғылыми зерттеулерді, экологиялық ағартуды әрі әлеуметтік маңызы бар бастамаларды қамтиды. Бұл қызметтің маңызды бағыттарының бірі – қайырымдылық. Толығырақ...
Біз табиғат пен білім әр адамға қолжетімді болуы тиіс деп есептейміз, сондықтан ерекше көңіл мен қамқорлықты қажет ететін балалар мен ересектерді қолдауға бағытталған әлеуметтік және ағартушылық жобаларды жүзеге асырып келеміз.
Институт тұрақты түрде жетім балаларға, интернат тәрбиеленушілеріне, сондай-ақ мүгедектігі бар адамдарға арналған тегін экскурсиялар, серуендер мен шеберлік сабақтарын ұйымдастырады. Бұл іс-шаралар қатысушыларға өсімдіктер әлемімен жақынырақ танысуға, табиғатпен байланысын сезінуге және қолжетімді әрі жайлы форматта жаңа білім алуға мүмкіндік береді.
Қайырымдылық қызмет аясында Институт бірқатар ұйымдар мен мекемелермен ынтымақтасады. Олардың қатарында: КММ «Жанұя» СК, КММ «Шапағат» әлеуметтік қызметтер орталығы, «Ана тілегі» қоғамдық қоры, «Аутизмі және дамуында өзге де ерекшеліктері бар балаларға көмек қоры – «Луч света» ҚҚ, «Алатау аналары» ҚҚ, Медеу ауданының «Мүгедектердің ерікті қоғамы» ҚБ, «Адам және қоғам» ҮЕҰ ҚБ, «Kausar bulaq» мүгедек балалар ұйымы, «Жас өмір» ҚБ, КММ «№2 арнайы мектеп-интернат», КММ «Аяла» әлеуметтік қызметтер орталығы, «Асыл Дария» ҚҚ, «Шынға өрлеу» әлеуметтік клубы, КММ «Шаңырақ» әлеуметтік қызметтер орталығы бар.
Жақында Бас Ботаникалық баққа сөйлеу қабілеті бұзылған балаларға арналған №9 арнайы мектеп-интернатының тәрбиеленушілері келді. Олар үшін жылыжай кешені бойынша экскурсия ұйымдастырылды. Балалар лимон, кумкват, пальма және басқа да жылыжай өсімдіктерінің қалай өсетінін көріп, олар туралы көптеген қызықты деректермен танысты.
Сондай-ақ инклюзия мен экологияны біріктіретін жыл сайынғы InEco Fest отбасылық экологиялық фестивалін ерекше атап өткіміз келеді.
Бұдан бөлек, жыл сайын қазан айында Қарттар күніне орай қарт адамдар айлығы өткізіледі. Осы айлық аясында бір ай бойы олар үшін ботаникалық баққа кіру тегін болады.
